WILLIAM SHAKESPEARE

Sékspir lo rwa téat

I zwé sanm la mizik

Li koz an vér

Li ral an travér

Li fé sant ban’n fraz

Ziska dan la bous volér.

Sékspir lo rwa la poézi

I fé swi’ng ban’n mo

Son langaz in trézor

Son lan’ng in minn lor

Son mazinasyon kom in lanp aladin

Nou ramas an kasyèt pou domin.

Sékspir lo rwa Listwar

I rakont romans lo rwa la rin’n

Li karès dousman Elizabèt

Li larg in foutan pou lédi Makbèt

Ziska la ba si la tér Zanglé

Ban’n gro zozo i fé la di la fé.

Sékspir lo rwa lamour

I sékwé lo kér ban’n zin’n marmay

Li déklans doulér la soufrans

Li ramin’n la pé si la tonm

Son léritaz in pwanyé la sab

Nou sobat pou ténir dan la min.

KISA I DI?

Kisa i di ankor soubik?

Amwin mi di tant

In bon pé i larg an panyé.

Kisa i manyé ankor totos?

Dopi Léonis pétèt…

Mé in paké i sobat èk mérd.

Kisa i saroy ankor la sab ?

Amwin mi sa rod dan'n la rivyér

Dé trwa i may an maskilin.

Kisa koméla i mèt mayo?

La fini ! nout tout i ral an slip

Si la pa déza an strin'ng.

Kisa koméla i ral lo kont ?

Asé èk sa !

Astér nou batay, nou dispit.

Kisa koméla i manz koson ?

Ah wè !

Vo myé in'n ti por karamèl.

 (Karl BEGUE)

MON FRER KOMOR

Mon frér Komor

Mon kouzin Maoré

Azot minm la fyérté

Ban'n nasyon pyétiné

In lan'ng pou in pèp

In kozé in langaz

In manzé in bondyé

Dan'n krwazé zot déstiné.

Mon frér Komor

Mon kouzin Maoré

Dan'n in péi la pi la koulér

Do moun i ogard azot an travér

I fé gro bous i koz par déryér

Kom si la pèst la lèp té kolé

Si zot po la koulér mon léspwar

Dan'n mon péi la Rényon gaté

Léspwar la pwin la po nwar.

Mon frér Komor

Mon kouzin Maoré

Dan'n mon péi tout nasyon mélanzé

La pwin la tras i paré

Ban'n rasis réyoné

Mé pourtan

La pwin la plas pou in moun

La po lé tro fonsé

Komor par si Komor par la

Sakin'n son sakin'n may pa.

(Karl)

ATER LA BA

Atér la ba, dan’n géto

Do moun lé kom zanimo

in’n si lot dan’n ban’n kaz an fér blan

rézinyé, ramaré, bouskilé.

Atér la ba dan’n somin

Marmay pou zoué kom lo syin

Ralé pousé in’n èk lot

Pou in kanèt, in balon la kok.

Atér la ba dan’n krwazé

Lo syin ban’n blan na gran dan

Berzé alman la kapé

La zanm ban’n kaf tran’n défilé.

Atér la ba si trotwar

Ban’n boug ban’n fanm la po té tro nwar

La rèt atér krazé kom lo syin krévé

In’n dé marmay na lo zyé pou pléré.

Atér la ba akoté nou minm

Ban’n boug sové pwav èk la po sarbon

La gout kou’d bal pou fé pèt zot tèt

MOMAN

Dan'n zyé moman

Na in kaskad larm détrès

I koul an gout pérl la mér

Dan'n kér moman na in rivyér

Larm tandrès

I saroy lamour dan la priyér

Ali minm pli zoli

Ali min'n i fon'n

An bonbon'n myèl.

Dan lo bra moman nou arvyin ti baba

Nou na lo drwa pléré

Si la po moman

Nou artrouv in dousér do lé

Lo gou si nout palé la résté

Ali minm lamour

Ali minm i rékonfort

Anou dan'n doulér.

Dan'n sové moman

Na in pon'yé la finn ni blan

Sitèlman traka pou son zanfan

Dan lo zo moman

Rimatis i dans séga

Afors saroy do lo ramas do bwa

Ali minm i trim

Ali minm i batay

Pou son marmay.

(Karl BEGUE)

       POESIE

La poésie

Est inutile

Si on crie

Bonne

Si on cogne.

Son coeur touche

Sa bouche

Puis boucle

Son pouce.

Il neige

Dans sa tête

Et pleure

Dans son coeur.

(David BEGUE)

 somin galé

somin galé i désan’n an tapok

plisé kon’yé lo zon’ng lo pié

la tér pwaké sanm galé kadok

i kapay dan’n zérb pokpok

lodér la pousyér la tér fané

i gob an paké dan’n lér fré

siko siyindan i dobout an foutan

dan’n santyé kabosé sanm lo san

lo san domoun lo kor krazé

dan’n goni foutor dan’n malizé

la tér an gazon sèk i désinn lonbraz

dan’n bor somin santyé galé pété

i ras la po lo zo dési dwa’d pié.